【Nars唇膏】夏天用Afterglow Lip Balm護唇膏 清爽不油膩素顏淡妝皆宜!|iTRIAL美評
24.06.2019

夏天來臨,好怕個嘴痴笠笠所以比較少用護唇膏。但其實夏天經常開冷氣,又無用足護唇產品,個咀其實仲乾過冬天~今次我哋iTRIAL美評試下大熱嘅 Nars Afterglow Lip Balm 護唇膏,睇下可唔可以改變我對護唇膏好笠既睇法~ Nars 今季推出多左出4 款新色調,連同 2 款熱賣既Orgasm金色珠光蜜桃紅及 Clean Cut 透明色,可以配合更多靚女們對色調既要求!

Text and Photos: Jacob 媽媽 (cjoycec) | Editor: Tiffany Ng & Katie Kwong


Nars 護唇膏
Afterglow Lip Balm

NARS 護唇膏 Afterglow Lip Balm

價錢:$250


實測 Nars 護唇膏
Afterglow Lip Balm

NARS 護唇膏 Afterglow Lip Balm

今次試呢款係Orgasm Clean Cut,即係無色。希望可以平日素顏時用及有時搽唇膏之前加一層Lip Balm 做底滋潤返。因為我多數用matte 質地既唇膏,搽得多咀唇會好乾。

NARS 護唇膏 Afterglow Lip Balm

質感:5分

可以見到搽上手後,只係薄薄一層光澤感,質地非常輕薄絕對唔會厚厚的一層。我試過其他牌子既護唇膏,有部份會痴到將雙唇黏起咁制。但呢款就好爽,好岩夏天單用或做base. 


NARS 護唇膏 Afterglow Lip Balm

實用度:5分

另外,圖中係搽左上雙唇,有細膩光感令個樣望落更精神。好適合淡妝甚至無化妝時用。

保濕度:4分

因為日日留係冷氣房,原本嘴唇好乾,試左一星期後雖然唔係好誇張地完全修復到乾既位置,但就撫平左乾到突起同埋撓起既死皮。


總評語:

呢個系列配方蘊含梔子花補濕複合成分,唔單止可以令雙唇平滑柔軟,更有效鎖緊底層水分,保持雙唇水嫩滋潤不乾燥。除此之外,佢亦加入抗氧化成分為幼嫩雙唇賦予更強保護。在質感,實用度和保濕度方面也不錯!是今季必備既唇部產品!

總評分
4.5
美評
Share :