Maybelline Fit Me 柔滑遮瑕膏｜開架品牌專櫃質素 乾肌平價遮瑕推薦｜iTRIAL用家分享

我相信大家對Maybelline 呢個品牌一定唔會陌生～

但你又會唔會好似我咁有聽過但從來未用過？

我就經常性聽到身邊啲 MUA 推薦呢支「Fit Me 柔滑遮瑕膏」話佢係 #開架好物 首選！

所以我就膽粗粗購入我人生第一支Maybelline～

保濕度高, 質地輕薄, 價錢仲好實惠～

完全唔輸專櫃品質，真係太抵用喇！

Text & Photo: Inki.T (IG：inkitsung)

實測 Maybelline Fit Me 柔滑遮瑕膏 Concealer

Maybelline Fit Me 柔滑遮瑕膏 Concealer

價錢：$79

產品介紹：

6色展開，自然貼合各種膚質之遮瑕膏。徹底修飾惱人部位。無油份配方配合，輕滑好推液狀質地，持妝一整天。細小刷頭，易於修飾局部細小部位。

產品實測部分

質地易推度：4分

質地幼滑但唔算好細緻，先用掃頭輕輕印上要遮瑕嘅部位，再用手指簡單推開，感覺快速同膚質溶合，輕薄冇負擔。

遮瑕度：3.5分

我嘅面部瑕疵較少，主要遮輕量嘅眼圈以及鼻翼2邊紅印，明顯份量唔需要用好多都可以成功遮蓋。但如果試驗用於遮蓋眼線，就算塗上2層也未能完全遮蓋，反而加重妝感。

保濕度：4.3分

本身我屬於「沙漠肌」，如果保濕度唔夠高的話，一上面已經會出現卡粉甩皮，而佢完全冇呢個問題，推開後都係水潤貼服。

持久度：3.9分 

持久度未算好出色，其實5個鐘左右已經感覺到有溶妝嘅感覺。但由於佢夠水潤，反而溶後一樣貼膚，亦都唔會好氧化，有種「越夜越美麗」嘅錯覺。

總評：

以呢個價錢但整體質素中上，絕對係交足貨有餘～

特別我呢類「沙漠肌」最注重就係底妝嘅保濕滋潤度～

而佢確實係呢方面頗為出色，連溶妝後都一樣貼貼服服～

講返我用嘅色號係10，適合暖色調偏白膚色遮瑕，亦都可以作為自然膚色提亮～

由於佢持久度唔算高，如果用錯色號，經過氧化就會好明顯突兀～

所以建議各位sis真係要試清楚，千祈唔好貪白呀！