IT cosmetics 眼部極致遮瑕膏 | 約會和派對必用 輕鬆遮蓋熊貓眼！

IT cosmetics 眼部極致遮瑕膏 Bye Bye Under Eye Concealer 一路以黎都廣受好評，不論外國定香港都有好多blogger推介！我自己以前都有用過，印像中滋潤度同遮瑕度都唔錯。我除咗黑眼圈問題嚴重，眼底肌膚都比較乾，所以通常都會揀啲coverage唔錯得黎滋潤度又高嘅遮瑕膏。

都有兩年幾無用過呢款眼部極致遮瑕膏，今次重新試一次，會由質地、防水度、遮瑕度及持久度進行測試，最後會分享下我推唔推薦大家！

Text & Photo: TIFFANY TSOI (IG：@your.beautyteller)

實測 IT cosmetics 眼部極致遮瑕膏 Bye Bye Under Eye

價錢：$220/12ml 

試用色號：10.5 Light / 20.0 Medium

產品特色：

Bye Bye Under Eye眼部極致遮瑕膏含有各種親膚成分，例如水解膠原蛋、白透明質酸及抗氧化劑，能夠打造自然遮瑕效果，妝感貼服不厚重。持久遮瑕，令肌膚一整天保持年輕亮麗效果！

質地：3.8分 

遮瑕膏幾滋潤，相對地質地會偏杰身，有一定厚度，但延展性唔錯，建議可以先係手背推開，再小量多次上係眼底。

防水度：4.5分

防水度好，睇圖會見到就算俾水沖過都無化開，同埋印乾之後都無脱色問題。

遮瑕度：4.5分 

遮瑕度中高，睇圖會見到未上遮瑕前黑眼圈嚴重，加上皮膚容易敏感，泛紅情況明顯，下巴亦有痘印。用完遮瑕膏後面上瑕疵遮得七七八八，而且望落唔會好厚好假。我自己使用方法係先係手背推開遮瑕膏，用手指取少量，輕輕按壓係有需要嘅位置，唔夠先重複再加。
 

貼服度：4分 

遮瑕膏本身幾滋潤，所以貼服度唔錯，唔會因爲眼底肌膚較乾而有卡紋情況。同埋如果好似我上面提到咁用手指上，可以透過手指熱力令到更貼膚。

持久度：3.5分

測試嗰日我帶妝約10個鐘，眼底遮瑕保持到7-8成，持久度唔錯。但係痘印部分就甩得幾多，可能因爲口罩摩擦。
 

總評：

總括黎講，我個人鐘意用IT cosmetics 呢款眼部極致遮瑕膏，用黎遮黑眼圈效果好，自然唔厚重，而且持久度都唔錯。但因爲滋潤度高，我覺得係更適合眼底比較乾嘅人用，更適合秋冬乾天氣用，如果唔係會溶。另外，就如佢嗰名所講，用係眼底效果會好啲，如果想遮痘印或暗瘡，用一款乾啲嘅遮瑕膏會效果較持久。同埋記得要小量多次，a little goes a long way！