CeraVe 活肌再生系列｜我的「早C晚A」新拍檔｜iTRIAL用家分享

30.03.2026

一直都知道 CeraVe 嘅紫色系列喺外國好受歡迎，YouTube 上面好多 skincare 愛好者都有推介，話佢温和又有效。不過之前香港一直無正式引入，想試都無門路。直到最近行屈臣氏，居然見到成個系列上架，當下真係有種「終於等到你」嘅感覺。

而且試過就發現一套成分可靠、溫和嘅護膚品真係好適合初試抗老嘅輕熟肌同敏感肌用家。今日就輕談一下系列入面三大王牌：「胜肽緊緻修復面霜」、「A醇抗皺精華」同「維他命C提亮精華」嘅魅力。

Text & Photo: Double Yong (IG：dou2le)

實測 CeraVe 活肌再生胜肽緊緻修復面霜

CeraVe 活肌再生胜肽緊緻修復面霜

價錢：$300/48g

CeraVe一向同皮膚科醫生合作研發，成分選擇與配方思路上具一定說服力。胜肽面霜主打蘊含高效胜肽，幫助修復肌膚表皮天然保護屏障，同時針對緊緻同提升彈性。唔少人聽到「胜肽」就聯想到抗老，事實上胜肽對於刺激膠原蛋白、撫平細紋同強化肌膚結構都有幫助。而且呢支係「不致粉刺配方」，無添加Paraben、香料同酒精，配方結構相對純粹，對敏感肌或易生閉口粉刺嘅膚質超友好。

質地：4.3分

面霜係白色乳霜狀，無任何香料味，質地唔算厚重，推開時感覺柔滑，帶微微滋潤感。喺手背上試，好快就吸收咗八九成，皮膚表面留有薄薄一層保濕膜，但完全唔黏膩，觸感係乾爽柔軟，適合香港又濕又焗嘅天氣用、兼偏好保濕感但怕笠怕膩嘅用家。

緊緻提升度：4分

我每日早晚洗完面，用完精華就用面霜，有再集中按摩下顎同蘋果肌位置。7日後對比返相片，效果最深刻係朝早起身照鏡，覺得塊面冇咁浮腫，下顎位摸上去實淨咗。以往洗完面後，皮膚有時會覺得有啲鬆垮，但連續用咗呢支面霜一星期後，肌膚嘅彈性同飽滿度有改善，尤其蘋果肌位置，視覺上好似冇咁「跌」落嚟，支撐力上漲。

實測 CeraVe 活肌再生A醇抗皺精華

CeraVe 活肌再生A醇抗皺精華

價錢：$300/30ml

A醇（Retinol）係護膚界公認抗皺有效成分之一，但好多人都怕刺激、脫皮。CeraVe呢支A醇精華同樣同皮膚科醫生研發，配方溫和，可以淡化細紋同皺紋，同時撫平肌膚 texture。無添加Paraben同香料，對敏感肌友善。雖然我本身唔算多皺紋，但額頭紋路都有少少，所以都好期待佢嘅效果。

質地：4.5分

精華係淡黃色半透明凝露狀，推開變得好水感，幾乎一搽就吸收。我試喺手背，完全無黏感，好似無搽過咁，但皮膚摸落去有微微軟滑感。質地好適合打底，之後再塗面霜都唔會因為疊加而變得厚重，依然清爽、保濕、零黏膩，感覺油肌都會鍾意。

減淡皺紋效果：4.2分

我用嘅時候都好小心，頭兩晚只係用少少，隔晚使用，觀察皮膚有冇不良反應。結果完全冇脫皮或刺痛，CeraVe 嘅温和配方果然名不虛傳。大約用到第五日，我發現上粉底嘅時候，眼底卡粉情況改善咗，即係話乾紋有被填平嘅跡象。對比相片亦可以見到，尤其係額頭嘅細紋，有明顯減淡嘅效果，皮膚紋理看起來細緻咗。結構性法令紋視覺上亦淺色咗，冇咁顯老態。我覺得呢支精華係一隻非常好嘅A醇入門產品，效果溫和漸進，適合怕刺激但又想試A醇嘅人。

實測 CeraVe 活肌再生維他命C提亮精華

CeraVe 活肌再生維他命C提亮精華

價錢： $280/30ml

維他命C係我晨間護膚必不可少嘅一環，主要用嚟抗氧化同提亮膚色。CeraVe 呢支含有10%維他命C，濃度適中，同樣有皮膚科醫生背書，可以強化肌膚屏障，提亮膚色。我特別欣賞佢無添加香料，因為好多維C產品都有少少橙味，呢支就幾乎無味，感覺純粹，同樣適合敏感肌使用。值得一提樽身設計係不透光，有助保持維C活性。

質地：4.0分

質地同A醇精華一樣咁出色，清爽水潤，吸收快。不過相比A醇精華嗰種瞬間吸收嘅乾爽，維C精華吸收後，皮膚會留有微微水光感，摸上去係潤澤嘅，但絕對唔黏。後續上面霜同防曬都唔會搓泥，日間使用感非常舒服。

提亮/美白度：4.1分

用維C產品嘅可能都最怕兩樣嘢：一係會染黃皮膚，二係效果唔明顯。CeraVe 呢支用咗一星期，完全冇出現染黃情況。提亮效果，我覺得佢屬於「調理型」多過「瞬間變白型」。朝早用完，成日塊面嘅光澤感都 keep 得幾好，冇咁容易暗沉。對比使用前，我發現膚色均勻咗少少，整體膚色看起來更通透、有精神，唔會好似熬夜後咁灰黃。係充滿健康嘅光澤感。